Во дел од „бомбите“ што денеска се слушаат во Кривичниот суд во Скопје беше пуштена и снимка на која разговараат поранешната министерка за внатрешни работи Гордана Јанкулоска и Мартин Протуѓер, шеф на Кабинетот на поранешниот премиер за новинарските прилози на А1 Телевизија дека секој вработен во државната администрација треба да предложи по 15 гласачи.
– Ептен ги наместиле. Гледам прилог и ги прашуваат луѓето за кого ќе гласаат и овие велат за ВМРО. Ги прашуваат зошто и овие кажуваат дека ќе им завршат за вработување или за нешто друго. Ептен беше, не знам како не ги познават по гласот по цел ден се на ТВ. Ќе треба добро да смислиме како да реагираме, вели Јанкулоска во разговорот.
Во друг разговор, Протуѓер и вели на Јанкуловска дека не знаат како да реагираат на ова и оти мора да ги тужбат новинарите.
Дел од „бомбите“ што се слушнаа беше и разговор меѓу Јанкулоска и Протуѓер за прилозите на Канал 5 Телевизија.
– Канал 5 не ги покриваат настаните, а газдата е кај нас на листа. Мора да ги стегнеме малку, вели Јанкуловска.
Протугер: Шврговски работи за СДСМ
Во друг разговор Протугер и се жали на Јанкулоска за тогашниот републички јавен обвинител Љупчо Шврговски, а сегашен адвокат на Сашо Мијалков.
-Копиле скапано мајката да му ја му е..м… Четири месеци чекам за „Надеж“предмет да отвори. Тој работи за СДСМ. Чист случај за апсење има за Наташа Савова и ништо не прави“.
– Сашо нека го стегне Шврговски – му вели Јанкулоска, на што Протугер и одговара дека „цело време е пијан“.
– Овој Шврговски ти кажувам јас за СДСМ работи. А бе ај кажи ми што направил, едно обвинение нема покренато. Ме нервираат педери како Шврговски. Каква порака сум му спремил, со мајки, шајки, со племе комуњарско, го завршува Протугер разговорот со Јанкулоска.
Пред присутните во судницата беа презентирани и аудио снимки кои откриваат како се мобилизирале вработените во Царината, како и снимки меѓу поранешни фунционери во кои тие разговараат за гласачите од дијаспората и колку се официјално пријавени во ДИК, како и за потенцијалните кандидати на изборите кои би можеле и би имале најдобри шанси да бидат на листата во изборните единции.
Ова предизвика реакции на одбраната дека снимките немаат никаква доказна вредност, на што судијата Осман Шабани рече дека доказите се прифатени и ќе бидат изведени, а потоа судот ќе цени дали тие се однесуваат на кривичното дело или не.
Во досегашниот дел од рочиштето слушнати се 46 разговори од вкупно 1.063 аудио снимки. За седум од снимките ќе биде исклучена јавноста по барање на Специјалното јавно обвинителство бидејќи се работи за приватни разговори.
Рочиштата за „Титаник“ заради мајчинските обврски на поранешната министерка Гордана Јанкуловска ќе се одржуваат во периодот од 10 до 12 часот по што ќе следи пауза од еден час, потоа од 13 до 15 часот со пауза од еден час и од 16 до 18 часот.