Имаше многу луѓе со фантомки и тетоважи и тие во суштина беа луѓето кои што ја координираа и ја наведуваа толпата во прес салата за време на упадот на 27 април, рече пратеникот на СДСМ Мухамед Зеќири на почетокот на неговото денешно сведочење пред Основниот суд Скопје 1.
-Мислам дека се траеше два, два и пол часа и се чудевме зошто полицијата не интервенира. Јас со неколку колешки бев засолнет во втората кабина за превод горе во Галеријата.
-Можев да видам дека кога толпата влезе во прес салата прв на мета беше Зоран Заев, сведочеше Зеќири.
Тој на прашањата на Обвинителството уште кажа дека дел од толпата го барала и него, упатувајќи му наврделиви зборови и општи закани дека ќе бидат убиени сите.
-Кога толпата беше најбесна се слушна истрел кој заврши на таванот. Тогаш толпата малку се смири но продолжи да напаѓа. Тогаш во салата влегоа пратениците Никола Тодоров кој беше турнат и исфрелен од салата, а Влатко Ѓорчев застана во првите редови да ги брани колегите, рече Зеќири.
На прашање на обвинителката Вилма Русковска дали го препознал човекот за кој Зеќири рече дека носел пиштол, тој кажа дека човекот со пиштолот носел црна маичка, бил ќелав и со брада.
На денешното рочиште за предметот “27 април”, освен Зеќири, треба да сведочи и тогашниот пратеник сегашен градоначалник на град Скопје, Петре Шилегов.