Речиси по дванаесет часа судење во Кривичниот суд Скопје 1, е во тек сведочењето на министерот за внатрешни работи Оливер Спасовски, кој пред Судот детално раскажува што видел тој на 27 април во Собранието.
– Во прес салата прво влезе група луѓе со фантомки на глава, а потоа и други луѓе, на пример некои од нив други и познав, како на пример Бате Геле, кој со слика на Сашо Мијалков во рацете викаше по нас „ќе ве убиеме сите до еден“. Меѓу другите што напаѓаа имаше и вработени во МВР, како што е човекот што на пример го викаат Џачката, не тепаа, не маваа, не туркаа, ни се закануваа дека ќе не убијат сите. По извесно време во салата влегоа луѓето од моето обезбедување и по некое време Ацо Ангеловски ја извади легитимацијата и побара напаѓачите да отстапат, но ништо не се случи. Потоа тој извади пиштол и пукаше во воздух – сведочеше Спасовски.
Тој во детали раскажуваше за движењето на напаѓачите, како и за тоа дека за човек што првпат влегува во Собрание, не може за кратко време да стигне до прес салата.
Од тука, заклучувам дека некој на тие луѓе им го покажувал патот, рече Спасовски.
Спасовски на прашање на обвинителството уште кажа дека е изненаден и вчудоневиден, дека никој од полицијата не реагирал, затоа што како што им било кажано на обезбедувањето на Спасовски немале наредба да постапуваат.
Спасовски пред Судот раскажа дека единствени кои притчале во помош се пратеникот Влатко Ѓорчев и уште неколкумина луѓе кои ги повикал тој.
– Ѓорчев застана пред насилниците, почна да ги смирува, побара дел од нив да застанат да не бранат. Еден од присутните со Ѓорчев ни даде половина од црна маица за да може да го запреме крварењето добиено од повредите на пратеникот Љупчо Николовски.
Другата половина му ја дадов на Заев зошто тој човек ми рече – нема да дозволам како патриот ниеден Македонец да умре. Ѓорчев ги повикуваше по телефон и другите пратеници на ВМРО ДПМНЕ, но никој од нив не дојде да ни помогне. Подоцна само Никола Тодоров дојде и викна Брза помош – сведочеше Спасовски.
На денешното судско рочиште сведочеа Никола Тодоров, Весел Мемети и Зоран Заев.