Претседателот на ВМРО ДПМНЕ Христијан Мицкоски, по повод Денот на независноста упати честитка до граѓаните и притоа во неа ја обвини власта дека ја претворила државата во како што она што не го посакуваат и повторно го нападна Договорот со Грција.
-Кога говориме за сегашноста потребно е да се биде реален и да се признае дека она што го имаме денес, не е она што отсекогаш сме го посакувале со нашата држава, затоа што посакувавме своја држава за да имаме квалитетно образование, институции без корупција, економија која нуди можности и сигурна егзистенција, здравство кое помага на болните, наука која произведува додадена вредност, млади кои ќе ја градат иднината тука, во своите родни места, држава која ќе го гарантира нашето достоинство и чест.
А денес со оваа власт добивме, го добивме спротивното, држава со најкорумпирани институции во Европа, денови исполнети со афери и сомнежи за криминал, притисоци, уцени на работа, политички монтирани случаи, образование кое е неконкурентно и млади кои си заминуваат. Несигурност и апатија, вели Мицкоски во видео пораката.
Тој истакнува дека денес земјата и во реалниот живот и во политиката се соочува со значајни предизвици и одново е на крстопат.
-На масата имаме штетен договор. Ви велат треба да сте За иднината на Македонија, а не ви кажуваат дека со тоа одлучувате за нова понижена Македонија, со променет идентитет, пасоши , лични карти. Историја и култура која ќе биде предмет на ревизија, и со отворена шанса на јужниот сосед да го блокира европскиот пат во било кое време. А во Европа, за таму се потребни работа, труд и континуитет. Таму се оди со резултати и стандарди, а не со зборови. Ако беше толку добар договорот, тогаш ќе ја немаше таа фанатична желба на власта за создавање на еуфорија, таа масовна и скапа кампања. И ним им е јасно дека овој Договор не е победа, затоа што ваква таканаречена победа можеше да има било кој претходник Претседател на државата и Премиер, исполнувајќи само еден единствен услов- да ги прифати сите грчки барања.
И на денот кога се слави нашата независност, овој 8-ми Септември, овој септември не треба да биде последниот кој го славиме под нашето уставно име, туку првиот септември преку кој ќе означиме победа за Македонија, да го означиме почетокот кој ќе значи смена за сликата на македонскиот политичар, за што ни е потребна смена на вредностите, исправање на неправдите и многу, многу работа, порача Мицкоски во видео обраќањето по повод 8 септември.