– Ќе одам да ги посетам нашите македонски пријатели и јасно ќе ставам до знаење дека САД го поддржуваат македонскиот народ, рече Матис во изјава за новинарите во Пентагон.
На новинарско прашање од Гласот за Америка дали е загрижен за мешањето на Русија во референдумот во Македонија, секретарот за одбрана на САД Џим Матис рече:
-Загрижен сум за тоа. Мислам дека не треба да има мешање во демократијата. Ако се изразува став на хартија е една работа, но ако се прават неволји како што Русија практикуваше во Украина и во САД, и сега во Македонија зашто Русија секогаш се прилагодува на специфичната ситуација, што се однесува до мене, јас би бил претпазлив, рече првиот човек на американската одбрана.
Џејмс Матис е вториот висок американски претставник кој неделава доаѓа во Македонија за да искаже поддршка за успешен референдум.
Утре во Скопје доаѓа помошникот државен секретар за Европа и Евроазија Вес Мичел. Тој ќе има средби со македонскиот премиер Зоран Заев и со други официјални претставници за поддршка на Договорот од Преспа меѓу Македонија и Грција и претстојниот референдум на 30 септември, соопшти Стејт департментот.
Мичел во Скопје ќе има средби и со претставници на парламентарните партии и на бизнис заедницата со кои ќе размени мислења и ќе ја нагласи американска поддршка за приклучувањето на Македонија во Западното семејство, се наведува во соопштението.