Првиот амандман се однесува на замената на зборот Република Македонија со Република Северна Македонија секаде во Уставот освен во членот 36 каде има историски аспект.
Вториот се однесува на Преамбулата на Уставот, каде одлуките на АСНОМ се заменуваат со Прогласот од Првото заседание на АСНОМ и се додава Охридскиот рамковен договор да биде конститутивен елемент на државата.
Во однос на Охридскиот рамковен договор, кој се вметнува во Преамбулата на Уставот, премиерот рече дека овој договор и досега бил вграден целосно во Уставот, но оти аргументите што биле дадени во дебатата биле дека кога веќе се отвара Уставот, тогаш и тој да се вгради за да биде конститутивен елемент.
Во третиот амандман се додава само еден став, а тоа е Републиката го почитува суверенитетот, територијалниот интегритет и политичката независност на соседните држави, што дава посилни гаранции за трајност и неповредливост на границите со Грција, иако се однесува за сите соседи.
Во четвртиот амандман, покрај потврдување на македонскиот идентитет, стои дека Републиката ги штити правата и интересите на своите државјани кои живеат или престојуваат во странство и ги унапредува нивните врски со татковината.
Само што започна седницата, координаторот на пратеничката група на ВМРО ДПМНЕ Никола Мицевски побара еден час пауза, поради тоа што не бил обезбеден директен пренос од седницата. Џафери дада пауза до 14.30 часот и напомена дека со самото присуство на новинарите на седницата, јавноста е обезбедена.
На прес конференцијата во Собранието Мицески рече дека власта бега од транспарентна дебата со опозицијата за најважните прашања во државата.
-Ги прашуваме СДСМ и Талат Џафери зошто првата седница на Уставната комсија, кога се утврдуваше предлогот за пристапување за измена на Уставот на Република Македонија беше пренесувана во живо, а сега кога треба да се дебатира за предлог амандманите, седницата не се пренесува во живо. Ова е прашање од највисок интерес за граѓаните на Република Македонија. Собранието има и законска обврска оваа дебата да ја емитува во живо на собранскиот канал, рече Мицевски.
Според него согласно член 32 став 1 од Законот за Собранието на Република Македонија Собранието има програмска одговорност за емитување на програмскиот сервис наменет за емитување на активностите на собранието.
-Затоа ние пратениците на ВМРО-ДПМНЕ и коалицијата „За подобра Македонија“ бараме и инсистраме седницата на Комисијата за уставни прашања да се пренесува во живо на собранискиот канал, рече Мицевски.
Претседателот на ВМРО ДПМНЕ Христијан Мицкоски пред неколку дена најави жестока дебата по поднесените нацрт амандмани за уставните измени, и на комисиската расправа и потоа на пленарната.
-Очекувам една жестока критика на сето она што ќе биде предложено од владејачкото мнозинство и од Владата во рамки на комисиската расправа, а потоа и во текот на собраниската расправа, за сето она што претходно го излажаа за владејачкото мнозинство да биде демаскирано и презентирано пред јавноста, вели Мицкоски во интервју за Сител.