Овие три дена се изнаслушавме глупости, златна, сребрена одговорност. Тоа се најголеми глупости, кажа адвокатот на Чавков Сашо Дуковски на прашањето како го коментира предлог законот за амнестија кој не предвидува амнестија за организаторите и насилниците на 27 април.
-Се изнаслушавме теткински муабети, да почекаме прво да се донесе законот, кажа Дуковски, потенцирајќи дека е против селективна правда.
Вчера Работната група на Телото за помитување во Собранието, го усогласи предлог законот за амнестија за настаните од 27 априли 2017. Притоа, како што изјави Зеќир Рамчиловиќ оние кои биле организатори и кои учествувале во обид за убиство нема да бидат амнестирани. Не прецизираше дали ќе се бара преквалификација на делото „терористичко загрозување на уставниот поредок“, но го спомена делото „здружување заради непријателска дејност“.
Јавната обвинителка Вилма Русковска вчера рече дека се прибираат докази за лицата кои беа дополнително споменати на судењето за случувањата во Собранието за 27 април, бидејќи, како што рече, не може да се поведе постапка само врз основа на исказ на еден обвинет. Таа потенцира и дека ако има докази нема да има проширување на постапката, туку може да има комплетно нова.
-Врз база на сведочењата за случувањата на 27 април, за лицата кои беа дополнително споменати се прибираат докази, затоа што знаете дека само врз база на изјава на еден обвинет не може да се води постапка. Не може да се води постапка, ниту врз база на изјава на еден сведок ако нема материјални докази, рече Рускоска одговарајќи на новинарско прашање пред конференцијата за борба против корупцијата.
Законот за амнестија се очекува во понеделник да биде ставен на гласање, откако утре собраниското Координативно тело ќе ја утврди предлог-верзијата.