Телата на двајцата мигранти кои шест месеци се во капелата во Бутел, ќе бидат погребани денеска во 14 часот. Погребот го организира и сите трошоци ќе ги покрие Центарот за социјална работа на Скопје. Ваквата одлука е донесена веднаш откако обвинителката која го води случајот испратила допис со кој се потврдува дека телата се идентификувани дека може да се погребат.
„Дописот од ОЈО стигна пред два дена и ние веднаш го организиравме погребот. Телата ќе бидат погребани утре(петок) во 14 часот на гробиштата во Бутел, согласно со законските процедури и верските обичаи. Сите трошоци ќе ги покрие Центарот за социјална работа“, изјави вчера за НОВА, Наташа Стојановска директорка на Центарот за социјална работа, која нагласи дека ова не е првпат тие да ги покриваат трошоците и да организираат погреби за мигранти кои починале на територија на нашата држава.
Од Здружението Легис велат дека погребната молитва (џеназе намаз) на двајцата мигранти ќе се одржи на гробишта, при самиот погреб, не во џамија бидејќи телата се во фаза на распаѓање.
Како што објави НОВА, во септември повеќе од два месеца никој не знаеше каде се телата на загинатите момчиња кои го изгубија животот на 25 јуни кога товарно возило марка „ивеко“ во кое се превезувале мигрантите удрило во ограда од мост при што уште 17 мигранти беа повредени, а возачот избега од местото на несреќата.
НОВА ги пронајде во капелата во АД Бутел, од каде што не дозволуваа да се погребат бидејќи, како што рекоа, „од таму никој не може да ги подигне бидејќи не се идентификувани“.
Починатите мигранти (едниот од Шри Ланка, другиот од Бангладеж) таму се чувани во фрижидери, но со секој ден стоење, сумата на фактурата е се поголема.
За тоа време институциите си ја префрлаа топката едни на други, а од Институтот за судска медицина тврдеа дека ОЈО, односно надлежниот обвнител требало да достави службена белешка за нивниот идентитет. Кога тоа не се случило во Судска ги завеле како НН, односно непознати лица.
Поминаа месеци додека не се расчисти целата оваа ситуација и се најде пропустот. Затоа време случајот зеде медиумски публицитет , а Македонија беше посочена како земја која ги прекршува човековите права.