Министерството за здравство информира дека заклучно со денеска (12 јануари) до 10 часот на Клиниката за инфективни болести и фебрилни состојби во Скопје се хоспитализирани шест нови пациенти со морбили од кои пет деца и едно возрасно лице. Со нив, бројката се искачи на 20 заболени од морбили или 18 деца и двајца возрасни.
Возраста на децата е различна. Најмладото е девет месеци, највозрасното има две и пол години, возрасното лице е девојка со наполнети 24 години од Кисела Вода и, како шпто наведуваат од министерството за здравство е со непознат вакцинален статус. Едно, пак, од новозаболените деца е од Радишани, останатите од градинката „Сонце“ во Ново Лисиче.
Од Клиниката, пак, информираат дека располагаат со 120 легла, но треба да се има в предвид, дека се хоспитализираат пациенти и со друга патологија. Најмладиот пациент е бебе од 8 месеци, а најстариот има 43 години од Скопје и е мајка на едно од заболените деца.
Во сите вакцинални пунктови во Скопје до денеска до 13 часот се вакцинирани 1.894 лица, а само денескa МРП вакцина примија 30 деца.