Дамјан Шишковски (23) останува во Финска. Македонскиот репрезентативен голман, за чии услуги во зимскиот преоден рок имаше интерес од неколку клубови во регионот, но и пошироко, ја прифати понудата на РОПС и се обврза на верност кон прволигашот од Рованиеми до крајот на сезоната со можност за продолжување на соработката.
Популарниот Шишко досега беше член на тимот на Лахти за кој настапи во 15 натпревари во 2018 година. Младиот голман е дете на Работнички од каде во 2015 година направи трансфер во Гент. По завршување со шестмесечните обврски во Белгија се врати меѓу дебармаалци и во овој период лани замина на далечниот север на континентот. Со своите добри партии во изминатиот период се наметна и кај селекторот Игор Ангеловски кој го повика за последните четири настапи во Лигата на нации во октомври и во ноември во минатата година – два против Лихтенштајн и по еден против Ерменија и Гибралтар.
Екипата на РОПС е од Рованиеми, главен град на Лапонија, најсеверниот регион во Финска.