Синот на пратеникот Горан Мисовски даде отказ на работното место во Агенцијата за осигурување, потврди пратеникот за НОВА.
Мисовски кажа дека неговиот син бил привремено вработен во Агенција за осигурување која го контролира приватниот сектор. Огласот траел една недела, а тој бил единствениот пријавен кандидат.
Ги исполнувал сите услови, вклучувајќи го и ИТ Мајкрософт сертификатот. За вработувањето, Мисовски ја информирал и Антикорупциската комисија.
И мајката на портпаролот на СДСМ Костадин Костадинов се повлече од работното место во Централен регистер.
„Иако мојата мајка е вработена на транспарентен оглас, објавен оглас, каде што се испочитувани сите законски процедури, јас разговарав со неа и таа ќе се повлече од работното место. Очекувам овој принцип на висок морал да го следат и останатите функционери“, рече Костадинов.
Министерот за информатичко општество и администрација Дамјан Манчевски претходно за денеска најави први резултати по реакциите во јавноста за случаи на непотизам со вработувања во институциите на лица блиски до функционерите на власта.
Оставките следуваат по притисокот во јавноста дека блиски роднини на функционери се вработуваат во државни фирми.
Посебно се истакнуваа примерите со пратеничките Мира Стојчевска – нејзиниот син беше вработен во ЕЛЕМ,а братот во РЕК Битола и на пратеничката Милева Ѓорѓиева – синот се вработи како инспектор за јавна безбедност, снаата во општина Радовиш на неопределно време, а братот како педагог во ОУ „Атанас Нивичански“ со несоодветно образование.
Антикорупционерите составија листа од 18 вработувања кои најавија дека ќе ги преиспитаат – вработувањето во ЕЛЕМ на сестрата на министерот за култура Асаф Адеми и на сопругот на државната секретарка во МВР Магдалена Несторовска, на ќерката на претседателот на Собранието Талат Џафери, вработувањето во МЕПСО на сестрата на министерот за економија Крешник Бектеши, вработувањата во училишта на сопругата на градоначалникот на Општина Берово Звонко Пежевски, на сестрата на пратеникот Александар Кирацовски, на сопругата на градоначалникот на Општина Неготино, вработувањето во МВР на сопругата на пратеникот Зеќир Рамчиловиќ.
Премиерот Заев вчера изјави дека очекува дел од блиските на функционерите да се повлечат.
„Тоа е лош пример иако се работи за мала бројка, а токму функционерите треба да бидат добар пример како да се однесуваат граѓаните. Ако ние им наложиме нешто ќе потврдиме дека е тоа надвор од закон, етика или слично. Се работи за личен чин кој очекувам тие да го направат. Правиме детална анализа. Се работи за личен однос и лична одговорност на одредени поединци“, рече Заев.
Од ДУИ не ги коментираат вработувањата на блиски роднини на нивни функционери.
Поради претседателските избори, сите вработувања се стопирани.
„Во периодот од распишување до оддржување на изборите за претседател и за градоначалник во неколку општини не смее да се почне било каква изградба на објекти со буџетски и јавни средства, не може да се вршат исплаќања на плати, пензии, социјална помош или други исплати што не се редовни месечни исплати и не може да почне ниту постапка за вработување нови лица или постапка за престанок на работен однос во државни и јавни институции“, информира Државната комисија за спречување на корупцијата.