Постигната е согласност за заедничко одбележување на цар Самоил свети Климент и свети Наум на дводневната средба на заедничката комисија за историски и образовни прашања меѓу Република Северна Македонија и Република Бугарија што заврши синоќа во Скопје.
„По долги дебати, заедничката комисија постигна согласност да даде препорака до владите на двете држави дека постојат доволно елементи за заедничко одбележување на Св. Климент, Св. Наум, и цар Самоил, како мост за градење на меѓусебни пријателски односи, во духот на Договорот за пријателство и добрососедство“, стои во соопштението од Инститот за национална историја.
На средбата е разгледувана можноста за заедничко одбележување на некои историски личности кои се значајни и за двете држави, додека дискусијата за учебниците по историја беше одложена за следната средба.
Ова е четврта средба на заедничката македонско-бугарска комисија за историски и образовни прашања, која е формирана согласно Договорот за добрососедство меѓу двете земји.
-Оваа комисија има два аспекти – едниот од нив е заедничко чествување на одредени историски личности и настани, при што нашиот фокус се историски личности и настани кои се извор на историографско – политички конфликт помеѓу двете држави и пречат во развојот на добрите односи помеѓу двете држави, вели историчарот и член на експертскиот тим, Петар Тодоров.
-Наша работа е да дадеме препораки до Владите, а на владите да постапат согласно нашите препораки. Нашиот предлог е да се слават ови личности при јубилејни, при значајни датуми, вели историчарот Тодоров во интервјуто за 1ТВ.