Динамо Загреб останува единствен претставник од регионот во фудбалската Лига Европа, а Аријан Адеми единствен македонски репрезент во второто, по квалитет, клупско натпреварување на УЕФА. „Модрите“ во реваншот успеаја да слават над Викторија Плзен со 3:0 и на тој начин да ја анулираат негативата од првиот меч во Чешка (1:2).
Стрелци за хрватскиот првак на „Максимир“ беа Мислав Орсиќ во 15. минута, Емир Дилавер во 34. минута и Бруно Петковиќ во 73. минута. Репрезентативецот на Македонија и капитен на Динамо Загреб беше стартер и одигра цел натпревар.
Вилјареал го елиминира Спортинг на Стефан Ристовски. По минималната победа во Лисабон (1:0), шпанскиот и португалскиот состав одиграа 1:1 на „Естадио де ла Керамика“ во преградието на Валенсија.
Челзи ја оправда фаворитската улога и во реваншот со Малме и со вкупни 5:1 се проби меѓу најдобрите 16 во Лига Европа. По триумфот во Шведска со 2:1, „сините“ триумфираа и на „Стемфорд Бриџ“ со 3:0 со головите на Олчивие Жиру во 55. минута, на Рос Баркли во 74. минута и Калум Хадсон Одои во 90. минута.
Со идентичен резултат во реваншот и Арснал се пласира во осминафиналето во ЛЕ. „Топчиите“ на „Емирати“ го победија БАТЕ Борисов (Захар Волков во четвртата минута автогол, Шкодран Мустафи во 39. минута, Сократис во 60. минута) и со камата возвратија за неочекуваниот пораз во Белорусија пред седум дена.
Мало изненадување приреди Краснодар со елиминацијата на Баер Леверкузен. И реванш мечот на тревникот на бундеслигашот заврши без победник со таа разлика што имаше погодоци (1:1) по ремито (0:0) во првата средба, па рускиот премиерлигаш благодарение на гол во гости опстана на европската сцена.
Лига Европа, шеснаесетфинале, реванши
Интер – Рапид Виена 4:0 (1:0)
Генк – Славија Прага 1:4 (0:0)
Баер Леверкузен – Краснодар 1:1 (0:0)
Челзи – Малме 3:0 (2:1)
Бетис – Рен 1:3 (3:3)
Динамо Киев – Олимпијакос 1:0 (2:2)
Бенфика – Галатасарај 0:0 (2:1)
Динамо Загреб – Викторија Плзен 3:0 (1:2)
Салцбург – Бриж 4:0 (1:2)
Наполи – Цирих 2:0 (3:1)
Ајнтрахт Франкфурт – Шахтјор Доњецк 4:1 (2:2)
Валенсија – Селтик 1:0 (2:0)
Зенит Санкт Петербург – Фенербахче 3:1 (0:1)
Вилјареал – Спортинг Лисабон 1:1 (1:0)
Арсенал – БАТЕ Борисов 3:0 (0:1)
Севилја – Лацио 2:0 (1:0)
Во заграда се резултати од првите натпревари. Ждрепката за осминафиналните двојки е денеска (петок) во 13 часот по средноевропско време.