За време на кампањата за претседателските избори, Собранието ќе одржи само седница на која повторно ќе се гласа за законите кои претседателот во заминување Ѓорге Иванов ќе ги врати.
Досега, тоа се повеќе од 20 закони на кои Иванов одби да стави потпис. Блокирани се и закони кои се донесени со двотретинско мнозинство и иако тие не треба повторно да се усвојуваат, ќе го чекаат потписот на новиот претседател за да бидат објавени во „Службен весник“.
Одговарајќи на новинарско прашање, што во случај, претседателските избори да пропаднат поради недоволен цензус, по што Џафери до следните избори би станал и в.д. претседател на државата, тој кажа дека во таков случај тој ќе стави потпис на овие закони и како в.д. претседател на државата.
За ваквиот преседан во Собранието, кога законите не можат да стапат на сила, претседателот на Собранието Талат Џафери вели дека ваквото однесување на Иванов можело да се предвиди уште по усвојување на Законот за јазиците.
-Иванов ја попречува институцијата Собрание и не е потребно дополнителен коментар на оваа тема, кажа Џафери.
Собранието на вчерашната седница усвои повеќе закони кои претседателот Ѓорге Иванов одби да ги потпише и ги врати назад до пратениците, меѓу кои законите за електронски комуникации, за ОТА и за данокот на додадена вредност.