Поголем дел од пожарите кои беснеа изминативе два дена се локализирани и ставени под контрола, соопштија од Дирекцијата за заштита и спасување.
Изгаснат е и пожарот кој ја зафати и Македонска Каменица, кој се закануваше да зафати и дел од куќите. Специјализираната воздухопловна единица на Дирекцијата за заштита изминатиов месец направи повеќе од 120 лета и исфрли 300 тони вода.
Од Владата соопштија дека институциите редовно ги следат сите локации низ земјава со цел да се превенираат предизвикани пожари и напоменуваат дека сите лица кои ќе се затекнат како палат оган на отворен простори кои предизвикуваат пожари поради палење на стрништа, ќе подлежат на законски санкции.
Министерството за внатрешни работи во 2019 година, за предизвикани пожари поднесе 8 кривични пријави за сторени 8 кривични„предизвикување на општа опасност“ против 8 сторители.
Државниот инспекторат за земјоделство и државниот инспекторат за шумарство и ловство вршат постојани контроли на терен со цел превенција од пожари предизвикани од палење на стрништа.
Владата упатува апел до граѓаните да внимаваат кога се на отворени места или при работни активности во шумите и други локации кои се со обрасната или необрасната шума. Поради опасноста од пожари, не треба да се палат стрништа или оган на отворен простор на необезбедени места, да не се пали отпад и друг запалив материјал и да не се фрлаат остатоци од цигари на отворен простор.
Поради појавата на шумски пожари се воведува забрана за движење во шума и шумско земјиште од 00:00 до 24:00 часот. Забраната започна да важи од 29.03.2019 година и ќе трае се до нејзино отповикување.
Доколку забележат оган или дим, граѓаните треба да го пријават на 195, а ако забележат лице кое потпалува стрништа да го пријават во полициска станица или на 192.