Судија во Унгарија денеска му одреди притвор на капетанот на крузерот „Викинг“ кој учествуваше во судирот со туристичкиот брод на Дунав во центарот на Будимпешта, при што загинаа најмалку седум јужнокорејски државјани.
Судијата на 64-годишниот капетан, државјанин на Украина, му одреди притвор од 30 дена, но соопшти дека капетанот може да биде пуштен со кауција од 50 илјади долари, под услов да носи апарат за следење и да остане во Будимпешта. Сепак, тужителите поднеле жалба на таа одлука и капетанот останува зад решетки додека судот не донесе одлука за жалбата.
Адвокатите на капетанот, кој е во притвор од четвртокот, тврдат дека нивниот клиент не направил ниту една грешка.
Крузерот „Викинг“ во средата вечер во Будимпешта се судри со помал туристички брод на кој имало 35 луѓе, воглавно јужнокорејски туристи.
Спасени се седум луѓе, а 21 лице се водат како исчезнати.
Ниту еден од туристите на бродот не носел елек за спасување, соопшти јужнокорејското Министерство за надворешни работи.
Откако бил удрен од крузерот, бродот прво почнал да се полни со вода, а потоа се превртел и потонал за многу кусо време, додека во Будимпешта беснеела силна бура.
Локалните медиуми јавија дека остатоци од бродот Сирена се пронајдени во коритото на реката по неколку часа пребарување во близина на мостот Маргарет, еден од главните мостови кои ги поврзуваат двата дела на унгарскиот главен град.