Во Општина Карпош немало, а нема ниту во моментот, ниту предмет, ниту одобрение, ниту решение, ниту каков било друг правен акт што се однесува на дом за возрасни лица. Такво нешто во Општина Карпош не постои, одговори градоначалникот Стефан Богоев на новинарско прашање дали од невладината организација Меѓународен сојуз на Бојан Јовановски поднела барање за дозвола за градба на старечки дом во Општината.
Градоначалникот Богоев, кој беше повикан да даде исказ за случајот „Рекет“ во Oбвинителството за гонењe организиран криминал и корупција, рече дека се што знале кажал во Обвинителството, но детали во јавноста нема да изнесува за да не наштети на истрагата.
„ Овде се работи за конкретна работа што ја спомнавте и затоа сакам да ја расчистам дилемата, меѓутоа за другите детали ве молам на трпение што ќе каже Обивнителството. Се што знам сум кажав таму за да помогнам на истрагата, рече Богоев, по денешната средба со министерот за внатрешни работи Оливер Спасовски, кој ја посети Полициската станица Карпош и локалната самоуправа, а заедно присуствуваа и на седница на Локалниот совет за превенција.
Основното јавно обвинителство за гонење на организиран криминал и корупција на 15 јули го отвори случајот „Рекет“ во кој првоосомничен е шоуменот Бојан Јовановски-Боки 13, а второосомничен бизнисменот Зоран Милески-Кичеец.
Првоосомничениот го искористил своето влијание кај јавен обвинител и зел 1,5 милиони евра од лице под истрага за да му ја олесни положбата. Второосомничениот овозможувал средби со лицето под истрага, кое во оваа истрага е сведок.
Градоначалникот на Општина Карпош Стефан Богоев и битолската градоначалничката Наташа Петровска дадоа исказ во Јавното обвинителството.
„Во интерес на истрагата, Обвинителството не е во можност да сподели детали околу содржината на дадените изјави. Паралелно со прибирањето на вербални докази, Основното јавно обвинителство за гонење на организиран криминал и корупција во континуитет дава насоки и наредби за вршење и на други истражни дејствија“, соопштија од Обвинителството.