Луксембург планира да стане првата европска држава која целосно ќе легализира производство и конузмирањето на канабис.
– Овие политики кои во моментот се спроведуваат и постојат веќе 50 години, очигледно не функционираат. Со забраната само ги привлековме младите луѓе кои на црниот пазар набавуваат канабис со сомнителен квалитет. Се надевам дека сите ќе имаме поотворен став кон дрогите, изјави минситерот за здравство Етиен Шанјдер за „Политико“.
Предвидено е полнолетните жители на Луксембург да можат да купуваат канабис за рекреативни цели за две години. Државата ќе го регулира производството и дистрибуцијата на канабис. Кон крајот на годината ќе биде претставен нацрт закон со повеќе детали за типовите канабис кои ќе се продаваат и начинот на оданочување.
Легализацијата на канабисот бара многу повеќе чекори отколку само прогласување на супстанцијата за легална – вклучувајќи и одредување даноци и проверки на квалитетот.
Според Шнајдер најверојатно со закон ќе биде забрането странци да купуваат канабис во Луксембург со цел да се спречи нарко туризмот.
Предвидено е и малолетници на возраст од 12 до 17 години да не бидат криминализирани ако поседуваат пет или помалку грама канабис, додека за поседување на поголемо количество ќе бидат парично казнувани.
Во Луксембург веќе е легализирана употребата на канабис во медицински цели. Декриминализирано е и поседувањето на мали количини канабис во рекреативни цели, но купувањето, продажбата и производството за сега се нелегални.