На пратеничка Фросина Ременски осомничена во „Рекет“ и е одземен пасошот, има забрана да го напушти Скопје, како и обврска секоја недела да се јавува во Суд. Овие мерки на претпазливост се одредени и за таткото на Бојан Јовановски, Миле Јовановски.
– Постапувајќи по предлог на Основното јавно обвинителство за гонење организиран криминал и корупција за определување мерки за претпазливост за три лица, по претходно доставени покани, лицата во текот на денешниот ден, пред судија на претходна постапка се произнесоа во однос на предлогот.
Ценејќи ги фактите и доказите во предлогот како и исказите на осомничените лица, судија на претходна постапка донесе решенија со кои го прифати предлогот и на осомничените Ф.Т.Р. и М.Ј. им определи мерки согласно член 146 ст.1 т.1,2 и 3 од ЗКП односно, забрана зе напуштање на живеалиште односно престојувалиште, обврска на обвинетиот да се јавува повремено на определено службено лице во судот и привремено одземање на патната и друга исправа за преминување на државната граница, додека за Х.Б. мерка за претпазливост согласно член 146 ст.1 т.3 – привремено одземање на патната и друга исправа за преминување на државната граница, соопшти Основен кривичен суд Скопје.
По денешниот исказ кај судија на претходна постапка, Ременски изјави дека не се чувствува виновна. Очекува Обвинителството да го докаже тоа што и го става на товар. Се додека не биде докажана вина со правосилно судско решение, вели, таа е невина.
-И кога давав исказ како лице од кое може да се добијат потребни информации во Обвинителството за организиран криминал реков дека не се чувствувам виновна, рече Ременски.
Таа рече дека нема да се повлече од функциите кои ги извршува.
Според Обвинителството Ременски го искористила својот авторитет за да изврши влијание.
Синоќа куќен притвор и е одреден на потпретседателката на Меѓународниот сојуз Јасна Мандиќ.
Против овие решенија, странките можат да поднесат жалба пред Кривичниот совет.
Од вчера истрагата за „Рекет“ се прошири на уште четири лица, за перење пари, измама и помагање во измама. Меѓу новоосомничените е и потпретседателката на Собранието Фросина Ременски, почесен претседател на Меѓународниот сојуз, потпретседателката на овој Сојуз Јасна Мандиќ, таткото на Бојан Јовановски, Миле Јовановски, Христина Блажевска и Бојан Јовановски кој е осомничен за нови кривични дела.
Основното јавно обвинителство за гонење на организиран криминал и корупција денеска поднесе Обвинение за случајот „Рекет“ против првите тројца осомничени- Бојан Јовановски, Зоран Милевски и Катица Јанева.