Личните податоци на 1,2 милијарда корисници на интернет се нашле незаштитени на еден сервер до кој можел да пристапи било кој со доволно точна веб адреса. Како што пишува американскиот специјализиран магазин „Вајерд“, станува збор за незаштитена база на податоци за која не се знае како е креирана, но е јасно дека податоците ги добивала од повеќе извори.
Базата ја сочинувале податоци на 1,2 милијарди корисници на онлајн сервиси, како социјални мрежи, а главно се состоела од имиња, имејл адреси и броеви на телефони. Среќа во несреќа е што во базата на податоци немало лозинки, ниту податоци за кредитни картички.
Незаштитената база на податоци била откриена во октомври оваа година, а во неа податоците се „тешки“ околу четири терабајти и вклучуваат информации собирани од профилите на Фејсбук, Твитер и Линкдин.
На серверот биле пронајдени четири милијарди профили и 650 милиони единствени имајл адреси што можеле да се поврзат со 1,2 милијарда вистински лица.
Магазинот наведува дека серверот веќе не е онлајн и до податоците веќе не може да се пристапи, а случајот бил пријавен во американското Федерално истражно биро (ФБИ).