Мешовитата македонско-бугарска експертска комисија работи со исклучително бавно темпо во последните седум-осум месеци, а двете страни може да се ослободат од баластот само со говорење на вистина, е оценка, меѓудругото, на претседателот на државата, Стево Пендаровски во интервју за телевизија 24.
„Не може на крајот на 2019 година и почетокот на 2020 година, работа на една комисија да биде која била или каква била етничката припадност на некој човек кој живеел пред 150 години“, рече меѓу другото Пендаровски.
Идејата на таа комисија и на македонско-бугарскиот договор за добрососедство, нагласи тој, е да видиме што нè спојува за одредени историски личности и каде можеме заеднички да ги ставиме.
„Ако пишува е споделена историјата, а ти сакаш да биде Гоце Делчев пишан како чист Бугарин, кој е резонот јас да го славам тогаш ако е само твој. Мора да биде дел твој, дел мој, макар со делото, па да можеме да го чествуваме заедно. Тоа е јасно како бел ден. Таа е формулацијата, појасни шефот на државата.
Според него, многу подобро би било доколку во мешовитата македонско-бугарска експертска комисија биле вклучени и неколку меѓународни експерти со познавање на Балканот од тој временски период.
„Мислам дека еден од факторите на успех што стојат зад Преспанскиот договор е што имаше и меѓунардоно присуство. Макар во позадина не само со Нимиц како официјален медијатор“, рече претседателот Пендаровски.
Тој оцени дека Бугарија во овој момент не прави никакви пречки и укажа на потребата од трпение бидејќи за очекување се опструкции при почеток на преговори што ќе траат со години.
„Како да ги надминеме? – Со долги часови, месеци и години објаснување дека тоа не е така и се разбира барање на меѓународни сојузници за нашата кауза и нашиот сет на аргументи. Нема друг начин. Друго е да речете прекинуваме и си седиме дома. Па, десет години седевме дома во времето на Груевски и мислевме дека сме најсилни на свет, а не било така, истакна Пендаровски.