Можни членови на криминални групи кои делуваат на подрачјето на град Скопје биле цел на полициската акција што СВР Скопје ја почна утрово во содејство со Одделот за сузбивање на сериозен и организиран криминал, Одделот за криминалистичка полиција и Одделот за специјални полициски операции, а во координација со Основното Јавно Обвинителство (ОЈО).
Пред и за време на акцијата, поради сомнение за инволвираност во наведените кривични дела, од слобода се лишени најпрво 10 лица од кои шест од Грчец и четворица од Арачиново, како што изјави Сузана Прањиќ Талевска, началник одделение за информации од јавен карактер во МВР. Дел од нив се поврзани и со неодамнешното пукање во хотелот „Александар Палас“ во Скопје.
Некои од лицата се приведени по документирани кривични дела како предизвикување општа опасност и загрозување на сигурноста кон службено лице. Дел се, пак, како што нагласи, поради сомненија поради инволвираност во вршење на кривични дела како неовластено производство и пуштање во промет на наркотични дроги, психотропни супстанци и прекурзори и неовластено изработување, држење и тргување со оружје и распрскувачки материи.
„Врз основа на судски наредни се извршени претреси на 34 локации кај вкупно 32 лица во населените места Ѓорче Петров, Грчец, Ченто, Арачиново, Чаир, Бутел, Визбегово, Бардовци, Студеничани и Центар со цел пронаоѓање и обезбедување и пронаоѓање на материјални докази кои потекнуваат од извршени кривични дела“, истакна Прањик Талевска.
При претресите се одземени патнички моторни возила, пиштоли, пушки, рамки на муниција и муниција, куршуми од различен калибар, панцирни елеци. Но, и преносни компјутери, мемориски стикови, опрема за видео надзор, мобилни телефони со СИМ картички, пари во различни апоени, прашкаста материја и слично, додаде началничката на одделението за информации од јавен карактер во МВР.