Воведени се три нови типови на инсулин, два инсулински аналози, инјектибилни и таблетарни, a во изминатиот период се работеше активно и на нова стратегија за третман на дијабетес за наредните 10 години, се вели во соопштението на Министерството за здравство.
„Со Предлог-буџетот за 2020 година, обезбедуваме инсулини, инсулински игли, глукагон, ленти за мерење на шеќер и пумпи за континуирано снабдување на инсулин, во висина од 750 милиони денари“, е наведено во дописот.
Стратегијата за третман на дијатебес опфаќа елементи за подобрување на превенцијата, за рана детекција на болеста и нејзино соодветно третирање на секундарно и терциерно ниво. По нејзиното усвојување, ќе започне и ревитализација на сите центри за дијабетес во државата.
Вчера, со одлука на Владата и Министерството за здравство, беа уништени преостанатите количини на инсулин од Бирото за стокови резерви што биле набавени од времето на паралелен увоз. На тоа реагираа од опозициската ВМРО-ДПМНЕ, но таквиот потег го поздравија од Сојузот на здруженија на дијабетичари од каде побараа „уништување до последно инсулинско пенкало што е набавено од паралелен увоз“.