Новиот тарифник за извршителите што го предлага Министерството за правда, а треба да се најде на дневен ред на владина седница в петок, предвидува наградата да не биде поголема од 300 евра наместо досегашните 1.000 евра. Исто така, од ресорното Министерство предлагаат и да има репрограмирање на долговите на граѓаните, отпис на каматите и да се намали извршувањето врз приходите од една третина на една петина. 
Инаку, извршителите остро негодуваат на овој предлог и се закануваат дека утре излегуваат на штрајк, бидејќи нивната работа нема да била исплатлива и се закануваат дека ќе ги затворат канцелариите.
Најмногу негодуваат за тоа што со него им се намалува максималната награда од 1.000 на 300 евра, што може да ја наплатат при извршување од сметките на граѓаните.
„Доколку Министерството за правда пристапи кон измена на Тарифата како што е предложено, без позитивно мислење од Собранието на Комората на извршители, извршителите трајно ќе прекинат со работа сметано од денот на објавата на изменетата Тарифа во Службен весник“, стои во одлуката на Комората на извршители.
Притисокот да се постигне правичност во извршувањето интензивно почна пред две години кога здруженијата на граѓани и борци за социјална правда, јавно се спротивставија на Комората на извршителите, пријавувајќи случаи во кои се гледаат астрономските разлики во основицата на долгот и каматите што ги плаќале граѓаните. Неодамна Комората на извршители на прес-конференција најави отворен ден со граѓаните за наводно да имаат увид во случаите и да им помогнат на граѓаните да ги отплатат долговите.
Граѓанските организации неодамна побараа од Владата запирање на присилна наплата, ревизија на работата на извршители, нотари и доверители, враќање на работата на извршителите во судовите, како и утврдување на реален и нереален долг. Неформалната организација „Стоп за извршителите“ на протестот минатата недела повика да се прекине со блокирање на сметките што го оцени како незаконски, противуставно и спротивно на Декларацијата за човекови права, а побара и ветинг за извршителите.