Судијата од Апелацискиот суд во Гостивар и член на Судски совет, Зоран Теофиловски, по 24 часа од полициската акција, утринава самиот се пријавил кај судијата Седат Реџепагиќ во Основниот Суд Скопје 1. Неофицијални информации говорат дека тој се повикал на имунитетот што значи дека Судскиот совет денеска ќе треба итно да се состане и да одлучи дали ќе му го одземе имунитетот на Теофиловски. Неофицијално, Обвинителството побарало мерка притвор.
Теофиловски пред една година стана член на телото кое именува и разрешува судии, а на позицијата дојде од гостиварскиот Апелациски суд. Пријавувањето на Теофиловски следува откако вчера тој не беше достапен за органите на прогонот. Полицијата не го пронајде дома, а беше најавено и распишување потерница по него.
Теофиловски е под истрага од Обвинителството за организиран криминал за противправна легализација на државно земјиште и осомничен е за злоупотреба на службената положба и овластување заедно со уште седум други лица меѓу кои и поранешни вработени во општина Тетово.
Во врска со случајот се јави и Основното јавно Обвинителство за гонење на организиран криминал и корупција во кое ја потврди наредбата на надлежен обвинител за спроведување на истражна постапка против осум лица за кои постои основано сомнение дека сториле кривично дело – злоупотреба на службена положба и овластување предвидено и казниво по член 353 став 5 од Кривичниот законик. Притоа, се вели во дописот на ОЈО, осомничените овозможиле на правното лице (спортско здружение „Љуботен“) да се стекне со право на сопственост на градежно земјиште со површина од 4.410 м2 откупувајќи го по цена од 43,00 денари за 1м2 или во вкупна вредност од 188.307,00 денари, а на штета на средства на Буџетот на РСМ во висина од 52.920.000,00 милиона денари.