Предвремените парламентарни избори се ценат од исклучитено значење за сите граѓани во државата без разлика на нивната партиска или етничка припадност, а претстојниот период носи дополнителна одговорност врз сите членови на извршната власт за своите функции да ги извршуваат во интерес на јавноста. Ова го истакна денеска на прес-конференција во Владата, дополнителната заменик-министерка за внатрешни работи, Славјанка Петровска.
„Министерството за внатрешни работи ќе продолжи да ја гарантира безбедноста на граѓаните. Изминатите две години поставивме стандарди во работата на полицијата, според кои таа не може и не смее да биде злоупотребувана од ниту една политичка партија. Времето на партиски штабови во МВР е поминато, како што е минато и времето кога полицијата тепаше студенти, правеше упад во невладини организации и апсеше новинари“, рече таа и додаде дека значаен придонес на техничката Влада е да организира фер и демократски избори.
Нагласи дека МВР има специфична структура на организационите единици, но единствена гаранција за професионално функционирање е законски применетиот принцип на хиерархија и управување со полициските задачи.
Поголем дел од несогласувањата со техничкиот министер Чулев се надминати, ставот за кривична останува
Дополнителната заменик-министерка за внатрешни работи, Славјанка Петровска во врска со односите со техничкиот министер, Наќе Чулев изјави дека се коректни, најголем дел од несогласувањата се надминати, но, сепак, останува на ставот за поднесување на кривична пријава.
Во однос на предлогот на Чулев, Ристе Ставревски да биде началник на СВР Скопје, таа вели дека треба да се има предвид дека во 2016 година имало слични ситуации на несогласување на техничкиот министер со дополнителниот заменик-министер кои во различни судски постапки завршиле различно.
„Останувам на принципиелниот став дека лице, не е битно кое, што е вмешано или на било каков начин во минатото учествувало во вршење изборни притисоци, не треба да биде на една од челните позиции. Но, на крајот на денот, секој носи политичка одговорност за кадрите кои ги предлага“, рече на прес-конференцијата во Владата, дополнителната заменик-министерка Петровска.