Од вчера стапија на сила новите правила за визите за краток престој во земјите на Европската Унија (ЕУ). Наместо 60 евра, колку што се плаќаше досега, тие ќе чинат 80 евра, но процедурите ќе бидат малку поедноставни. Во иднина, патниците ќе можат да поднесуваат барање за виза за краток престој (до 90 дена) и тоа шест месеци пред планираниот пат, наместо три месеци како што беше до сега, соопшти Европската Комисија.
Европската Комисија ова поскапување го правда со фактот дека се потребни поголеми ресурси за администрацијата, посебно за борбата против „нерегуларна миграција“ и подобро детектирање на потенцијални безбедносни ризици. Ова е прво поскапување од 2006 година. Правилата важат за 22 земји членки на ЕУ кои се дел од Шенген зоната. Новите правила ќе им овозможат на земјите на ЕУ да ги прилагодат процедурите, зависно од тоа колку третата земја соработува со ЕУ во делот на реадмисија и враќање на своите граѓани.
Европската Унија ќе го олесни и добивањето на визи за повеќе влезови кои ќе се однесуваат и за подолг временски период за честите патници.