Ситуацијата со случаите на КОВИД-19 е најлоша во Италија, потврдија европските институции при тоа отфрлајќи ги критиките дека италијанските власти сториле нешто што не е во склад со процедурите.
Во Италија, од минатата среда до сега, дијагностицирани се 374 лица од кои 12 починаа.
„Ова можеше да се случи секаде“, рече Андреа Амон, шеф на Европскиот центар за контрола и превенција на болести, чии експерти се на теренот во Италија каде ја истражуваат состојбата.
Според Европскиот центар за контрола и превенција на болести може да се очекува ситуацијата во Италија да се преслика и во други европски држави.
„Наша проценка е дека најверојатно ќе видиме слични ситуации и во други земји во Европа“, рече Андреа Амон за време на прес-конференцијата во средата со високи претставници на Европската комисија и Светската здравствена организација.
Само околу пет проценти од случаите со корона-вирус бараат сериозен третман, како вентилација за поддршка на дишењето, односно само еден или два процента од заразените умираат од оваа болест.
Европските институции упатија апел за поефикасна координација меѓу земјите членки.