Зоран Заев преку прогон и злоупотреба на судот и обвинителството сее страв во обид да ги замолкне медиумите кои се охрабруваат да ги истражуваат неговите криминали и да ја информираат јавноста за корупцијата и рекетот. Преку обвиненија, тужби, пресуди и затворски казни, тој сака да си купи мир и да ги цензурира новинарите кои одбиваат да клекнат на колена и да се приклучат на медиумско-обвинителско-политичката рекет машинерија, се вели во соопштението на ВМРО-ДПМНЕ.
„Зоран Заев заплашува и осудува новинари и врши директен напад врз слободата на медиумите и правото на јавноста да биде информирана. Македонија денес е единствена држава во Европа каде што новинар е осуден на казна затвор само заради пишан збор. Зоран Заев и СДСМ се исплашени и затоа нарачуваат затворски казни за медиумите. На тој начин Заев се надева дека ќе се сокрие неговата улога во случајот „Рекет“ и ќе се покријат сите скандали во истрагата кои треба да ја избришат трагата која што води кон главата на октоподот. Заев нарачува, Русковска обвинителството спроведува, а Кацарска судството пресудува“, стои во реакција на опозициската партија.
Реакцијата на ВМРО-ДПМНЕ доаѓа по шестмесечната затворска казна што е изречена за уредникот на „Инфомакс“ и, според опозицијата, е доказ за едноумието што сака да го наметне Зоран Заев.
„Новинарот Александар Митовски е осуден поради тоа што на виделина изнесе докази од јавен интерес во кои постојат сериозни индиции дека Зоран Заев ги предупредил Бојан Јовановски и Зоран Милевски дека се откриени во „Рекет“. МВР и ОЈО, по наредба на Оливер Спасовски и Зоран Заев, претходно вршеа претрес во „Нет Пресс“ само поради објава на скандал каде што има сомнеж за сериозен криминал од страна на висок функционер од Владата на СДСМ. Тоа го изведоа додека медиумите протестираа пред ОЈО против притисоците врз новинарите“, е ставот на ВМРО-ДПМНЕ.
Кривичните пријави и политичкиот прогон против уредникот на „Инфомакс“, Александар Митовски, новинарот и уредникот на „Лидер“, Љупчо Златев, против новинарот Горан Момировски и телевизија „Алфа“, според ВМРО-ДПМНЕ се јасен показател дека „власта се плаши од вистината и од правдата во Република Македонија“.