Министерството за здравство (МЗ) соопшти дека од денеска се прават тестови за коронавирус и во Поликлиниката „Идадија“ што четврти пункт за граѓаните на Скопје по поликлиниките „Јане Сандански“, Ченто и Чаир. Со ова, двојно е зголемен капацитетот за тестирање во главниот град. Од минатата недела во функција се и пунктовите во Штип, во Тетово, во Струмица, во Прилеп, во Охрид, во Куманово, во Кочани, во Битола, во Велес, во Кавадарци, во Гевгелија и во Струга, истакнуваат од Министерството.
Граѓаните, како што се посочува, одат во пункт за тестирање само во точниот термин што е закажан преку нивниот матичен лекар, а не директно во пунктот. Оние кои имаат симптоми на ковид-19, но и оние без симптоми треба да се јават кај својот матичен лекар и прецизно да одговорат на епидемиолошката анкета. Согласно ова, матичниот лекар врз база на евалуација на здравствената состојба и податоците го спроведува тестирањето, односно укажува на тоа дали кај пациентот е потребно тестирање. Во овој процес, вклучени се близу 1.200 матични лекари кои освен за детекција се задолжени и за следење на пациентите, наведуваат од Министерството.
До крајот на неделата, почнуваат со работа и други пунктови во здравствените домови ширум државата, согласно големината на градот, што всушност значи тројно зголемување, потенцираат од МЗ. Од таму апелираат до граѓаните да даваат веродостојни и точни информации за нивната здравствена состојба во епидемиолошката анкета и да ги почитуваат мерките од надлежните институции за заштита од коронавирусот.