Вкупно 2.207 македонски државјани се вратени во земјава заклучно со 4 април, покажуваат податоците на Министерството за надворешни работи (МНР) кое го организира враќањето на лицата затекнати во странство.
Како што објави МНР на Фејсбук профилот, од 22 март до 4 април на Глобалниот контакт центар за конзуларни услуги во итни ситуации на Министерството се пријавиле 5.228 македонски граѓани од целиот свет кои сакаат со авион да се вратат во земјавата. Од нив 2.890 се согласиле да бидат сместени во државен карантин. Најголем дел од повиците – 93 проценти или 4.861 доаѓаат од Европа, а 272 повици се регистрирани од останатите континенти.
Со досега реализираните чартер летови од Ла Валета, Загреб, Љубљана, Виена, Базел, Минхен, како и по два лета од Берлин и од Келн/Бон во земјата се вратиле 1.445 македонски државјани. Преку три хуманитарни конвои со автобуси и автомобили од Црна Гора, Турција и Словенија обезбедено е враќање на 150 лица. Со посредство на Австрија и на Португалија, во земјава се вратени и 11 македонски државјани од Перу.
МНР во соработка со странски претставништва кај нас, репатрираше и над 600 странски државјани меѓу кои и на Австрија, Австралија, САД, Франција, Хрватска, Црна Гора и Косово.
По избувнувањето на глобалната пандемија со коронавирусот, сите гранични премини на земјава беа затворени на 16 март, а на 18 март беше затворен и Меѓународниот аеродром Скопје. По враќањето во земјава сите патници се упатуваат во државен карантин.