Домашни оператори, заинтересирани странски компании и граѓани до 20 април, кога истече рокот, доставиле мислења и забелешки до Aгенцијата за електронски комуникации во врска со планираното издавање одобренија за користење радиофреквенции за 5Г технологијата. Сашо Димитријовски, директор на АЕК, во интервју за МИА вели дека сите чекори досега се спроведуваат согласно динамиката предвидена со Националниот оперативен бродбенд план (НОБП), усвоен од Владата во април минатата година.
„Сите пристигнати мислења ќе бидат разгледани од стручните служби во АЕК и ќе бидат соодветно имплементирани во законската постапка, која е предвидена согласно Законот за електронските комуникации (ЗЕК) за доделување на овие радиофреквенции. Согласно НОБП, тендерската постапка се очекува да започне до крајот на 2020 година. Ќе се сублимираат пристигнатите мислења и заедно со постојната регулатива во Македонија, која е на иста линија со европската, ќе се пропишат условите што ќе бидат наведени како барања, кои операторите што ќе добијат одобренија ќе треба да ги исполнат“, појаснува Димитријоски.
До овој момент, АЕК спроведе мерење на нејонизирачко зрачење на неколку локации од 5Г тест мрежата на Македонски телеком за која е издадено привремено одобрение до 31 октомври годинава за опсегот 3.6-3.7 Mhz.