Ние кажавме кои се нашите услови за Република Северна Македонија да биде примена во Европската унија, изјави бугарскиот премиер Бојко Борисов на министерскиот совет вечерва по Самиот ЕУ-Западен Балкан. Тој притоа потсетил дека Бугарија прва ја поддржала Македонија за членство во НАТО, изрази задоволство што Договорот за добрососедство влезе во Декларацијата од Самитот ЕУ – Западен Балкан и потсети дека при евентуална отстапка од него, неговата земја може да стави вето во било кое поглавје од преговарачкиот процес на Македонија со Европската Унија.
„Што да им кажеме на крајот, дека сме Македонци? Ние ги сакаме, ги почитуваме и би им дал најбратски совет – да не си поставуваат невозможни услови, рекол Борисов.
Ваквиот негов одговор дојде по прашањето од бугарски новинар „врз која основа ги поддржуваме кога велат ако треба да се откажеме од јазикот, подобро да не влегуваме во ЕУ“
„Тоа е нивно право, ние не го коментираме. За време на наши предизборни кампањи какви сè работи не слушавме за Турција, но натежна добрососедството. Ние сме европска држава и работиме по европски терк, а тоа е да работиш според документи. И кога 27 држави ќе поддржат документ во кој спроведувањето на Договорот за добрососедство е наведено како услов, ние сме ја завршиле нашата дипломатска работа. Ако некој отстапи од тој документ, при секое поглавје Бугарија може да го блокира. Затоа, како што им реков, зависи од вас. Нашето пријателство и братство го покажавме кога требаше да им дадеме поддршка. Ние кажавме какви се нашите услови за да бидат примени во Европската Унија. Тоа не е (по) желба, ако нешто не ти се допаѓа, никој не те кани. Немаме тема. Ако сакаат“, истакна бугарскиот премиер.
Дел од обраќањето на македонскиот премиер Оливер Спасовски пред лидерите на ЕУ и на Западен Балкан се однесуваше токму на догововорите со Бугарија и со Грција при што нагласи дека треба да се почитуваат подеднакво од двете страни,
„Подготвени сме за следните чекори и ќе работиме посветено со Комисијата и Советот на ЕУ за што поскоро да ја закажеме првата меѓувладина конференција која ќе го означи практичниот дел од преговарачкиот процес согласно новата методологија. Би сакал во оваа прилика уште еднаш да ве уверам дека Северна Македонија ќе остане посветена на фундаменталните реформи и ќе продолжи да придонесува за европската безбедност. Преспанскиот договор со Грција и Договорот за пријателство со Бугарија се нашиот влог во идната заедничка европска иднина при што ќе биде од исклучително значење да продолжиме да ги спроведуваме со добра волја подеднакво од наша страна како и од страна на засегнатите земји членки, истакна Спасовски.