Од отворањето на гласачките места во 7 часот утрово, досега е регистрирано едно нарушување на јавниот ред и мир во Скопје на избирачкото место во ОУ „Петар Поп Арсов“. Лицето В.Ш. (47) го нарушил јавниот ред и мир, откако започнал расправија со претставници од избирачкиот одбор, а во еден момент ја потегнал чантата на претставничката во ИО, а потоа со мобилен телефон ја фотографирал просторијата. Тој е лишен од слобода и известен е јавен обвинител за добивање на натамошни насоки, информира портпаролот на МВР, Тони Ангеловски на денешната прес-конференција.
Ангеловски истакна дека гласањето на другите избирачки места се одвива мирно, со почитување на протоколите за гласање, а од неправилности што се пријавени во МВР, има неколку случаи на агитирање, носење гласачи на гласање, испишани графити на избирачки места, како и неколку пријави за наводно нудење пари за глас.
„Ова се добиени пријави по кои постапува МВР и откако ќе се утврдат фактите, соодветно ќе ја информираме јавноста“, нагласи портпаролот на МВР.
Ангеловски информира дека во 7:30 часот во ПС Бит пазар било пријавено дека пред избирачки места во ОУ „Цветан Димов“ и „Даме Груев“ биле испишани графити со содржина поврзана со изборите, а графити биле испишани на ОУ на улиците „Коста Абрашевиќ“, „Браќа Реџепагиќ“ и „Петре Георгиев“ на подрачјето на ПС во Чаир.
Во СВР Велес, посочи портпаролот на МВР, било пријавено дека во близина на избирачко место во кавадаречкото село Сирково биле испишани графити поврзани со изборите.
„Во полициска станица во Крива Паланка се пријавени два случаја на организиран превоз на гласачи до гласачките места, како и четири пријави за агитирање кон гласачи и тоа на ул. „8 Октомври“, ул. „Јоаким Осоговски“ и во селата Узен и Нерор“, истакна Ангеловски.
Агитирање е пријавено и во СВР Струмица за село Пиперово и во Нов Дојран, додека во село Самоилово едно лице се заканувало кон друго за да гласа за одредена политичка партија. Во полициското одделение Ново Село, подвлече портпаролот на МВР, граѓанин пријавил дека едно лице одзело лична карта на друго лице и гласало во негово име.
Во полициска станица во Радовиш, информира тој, Ф.В. од Радовиш пријавил дека П.И, исто од Радовиш му нудел пари за глас, додека во СВР Битола Е.Е. пријавила дека непознати лица и нуделе пари за глас.
„Во СВР Битола било пријавено и дека полициски службеник кој обезбедувал избирачко место во училиштето во село Дебрешта им кажувал на граѓаните кој број да го заокружат на гласачкото ливче. Веднаш е известен одделот за внатрешна контрола и се постапува за да се расчисти овој случај“, рече Ангеловски.
Во СВР Тетово било пријавено дека во ОУ „Коста Рацин“ во село Брвеница имало неколку непознати лица кои ги запишувале граѓаните. За сите овие настани, нагласи портпаролот на МВР, се преземаат соодветни мерки за расчистување и отакако ќе бидат расчистени соодветно јавноста ќе биде информирана.