Температурата на воздухот денеска во Гевгелија се искачи до 42 степена, а во Демир Капија се регистрирани 40 степени Целзиусови. Високи температури, според мерењата на УХМР, имало во сите градови, па максималните температури во Охрид и во Берово била 34, во Претор – 35, во Крива Паланка, во Битола и во Прилеп по 36, во Тетово – 37, во Скопје Петровец, во Штип и во Виница по 38 додека во Скопје Зајчев Рид и Струмица по 39.
Времето во целта земја беше сончево и многу топло, во западните и крајните и источни делови со мала до умерена облачност. Дуваше слаб до умерен ветер претежно од западен и северозападен правец.
До крајот на денот ќе се задржи сончево со мала до умерена локална облачност, во планинските подрачја во северните делови со услови за краткотраен дожд и ретки грмежи. Долж Повардарието ќе дува умерен до засилен северен ветар. Намалување на температурата метеролозите најавуваат од утре.
Времето утре ќе биде променливо облачно со сончеви периоди, а на места ќе биде нестабилно со пороен дожд, грмежи и засилен ветар. Во текот на денот ќе дува умерен, а долж Повардарието засилен северен ветар што ќе предизвика опаѓање на дневната температура. Утринската температура ќе биде во интервал од 14 до 24 степени, а максималната ќе достигне од 30 до 38 степени. УВ индексот ќе изнесува 8.
Во Скопје, времето ќе биде сончево со умерена облачност и умерен до засилен северен ветар. Ќе има и услови за краткотраен пороен дожд и грмежи. Минималната температура ќе се спушти до 20 степени, а максималната ќе достигне до 34 степени.
Од недела до вторник времето ќе биде претежно сончево, а дневните температури ќе бидат пониски за пет-шест степени во однос на денешните. Повторно дестабилизирање со локален пороен дожд и грмежи се очекува во среда.