Артина Ќазими од коалицијата меѓу Алијанса на Албанците и Алтернатива е најмладата пратеничка во новиот состав на македонското Собрание додека Илија Николовски од коалицијата „Можеме“ предводена од СДСМ и Стојан Миланов од коалицијата „За обнова на Македонија“ на чело со ВМРО-ДПМНЕ се највозрасните. Ќазими е студентка, потекнува од гостиварски Добри Дол и има 23 години, а Николовски и Миланов по 72.
Просечната возраст на 120 пратеници, чии мандати беа верификувани на денешната конститутивна седница, е 45 години. Меѓу нив и 16 нови ликови на возраст меѓу 23 и 35 години. Кога сме кај родовата застапеност во собранискиот состав – во пратеничките клупи денеска седнаа 77 мажи и 43 жени.
На денешната конститутивна седница во Собранието се гласаше за избор на претседател и за членови на Верификационата комисија, но не и за наследник на Талат Џафери, точка од дневниот ред што е оставена за расправа штом се создадат услови.
На предвремените парламентарни избори на 15 јули, коалицијата „Можеме“ предводена од СДСМ освои 46 пратенички мандати, коалицијата „За обнова на Македонија“ на чело со ВМРО-ДПМНЕ – 44, ДУИ – 15, коалицијата на Алијанса на Албанците и Алтернатива – 12, Левица – 2 и ДПА – 1.