Вкупно 148 мигранти во товарни возила се откриени во текот на вчерашниот ден во два одвоени случаја. Во близина на Прждевски споменик, Демир Капија, полицијата откри 103 лица од Пакистан, од Авганистан, од Индија, од Египет, од Иран и од Сирија, а кај „Врело“ во село Ваксинце, Липково, уште 45 мигранти од Сирија, од Бангладеш, од Сомалија, од Пакистан и од палестинските територии.
Од МВР денеска информираат дека од полициски службеници од Полициската станица Неготино, во близина на Прждевски споменик вчера во 08:50 часот било сопрено патничко возило „Ауди“, со скопски регистарски ознаки, управувано од А.К. (35) од Скопје, а веднаш по него и товарно возило „Мерцедес“ со битолски регистарски ознаки.
„Возачот на товарното возило, А.М. (37) од Липково се дал во бегство, но кратко потоа бил пронајден. Во товарното возило биле пронајдени 103 мигранти од Пакистан, Авганистан, Индија, Египет, Иран и Сирија. Двајцата осомничени биле приведени во Полициската станица Неготино за понатамошна постапка“, стои во соопштението и се додава дека за настанот е известен Јавен обвинител, а мигрантите се сместени во Прифатниот транзитен центар „Винојуг“ Гевгелија за натамошна постапка.
Синоќа, пак, во 19:10 часот во Полициската станица за граничен надзор Сопот било пријавено дека на место викано „Врело“ во село Ваксинце, Липково, било затекнато товарно возило „ивеко дејли“, со скопски регистарски ознаки, управувано од непознато лице, кое се дало во бегство.
„Во возилото биле пронајдени 45 мигранти од Сирија, Бангладеш, Сомалија, Пакистан и палестинските територии. Мигрантите се сместени во транзитниот центар „Табановце“ за натамошна постапка. Се преземаат мерки за расчистување на случајот“, појаснуваат од МВР.