Се поизвесно е оти граѓаните од 1-ви август ќе плаќаат повисоки сметки за струја. Од информациите кои претседателот на Регулаторната комисија за енергетика, Марко Бислимовски, ги сподели со новинарите на утринскиот брифинг се поизвесно е оти цената на струјата ќе се покачи за најмалку пет отсто, но конечната одлука, според РКЕ, сепак ќе зависи од цената што ЕСМ ќе ја понуди на следниот тендер што ќе се одржи во втората половина од јуни.
Бислимовски вели оти компаниите веќе ги доставиле своите барања, но тие допрва ќе се разгледуваат.
„ РКЕ нема да прифати никакви дополнителни трошоци кои не се однесуваат директно на дистрибуцијата и преносот на струја. Сепак, најголемо влијание на крајната цена на струјата ќе има понудата на ЕСМ, односно цената по која ЕСМ ќе ја продава струјата на универзалниот снабдувач во следните шест месеци“, посочи Бислимовски.
Ако Регулаторна ги прифати барањата на енергетските компании цената на сметките за струјата би се зголемила за пет отсто, односно на сметките од 1000 денари покачувањето би било за најмногу 50 денари, но само под услов ЕСМ да не ја зголеми цената на струјата, брифираат од Комисијата.
Пресметките со кои енергетските компании бараат корекција на цената, веќе се доставени до Регулаторната Комисјата, која, согласно законот, новата цена на струјата треба да ја соопшти до крајот на јули, а ќе почне да се применува од 1 август.
Последната одлука за цената на струјата беше донесена лани кога електричната енергија се покачи за 7.4 отсто.
Билјана Божиновска