Американската влада ќе ја тужи агенцијата “Стандард енд пурс” поради нејзините проценки за хипотекарните обврзници пред избувнувањето на финансиската криза, јавува агенцијата.
Кривичната тужба ќе се однесува на високиот рејтинг на “Стандард енд пурс” за некои хартии од вредност поврзани со хипотеките од 2007 година, чија вредност подоцна нагло паднала. Во “Стандард енд пурс” тврдат дека нема никаква законска основа за случајот.
По објавувањето на веста на “Волстрит журнал”, цените на акциите на сопственикот на “Стандард енд пурс”, американската издавачка и медиумска групација Мекгро хил, опаднале за 14%, а на Мудис 10%.
“Стандард енд пурс” и другите рејтинг-агенции, веќе неколку години се цел на критики од страна на инвеститорите, политичарите и од страна на регулаторите за доделување на највисокиот рејтинг, ААА, на илјадници хартии од вредност кои подоцна изгубија голем дел од вредноста.
Издавачите на тие хартии од вредност им плаќаат на агенциите, што доведува до сомнеж за потенцијален судир на интереси.
Од агенцијата велат дека Министерството за правда ги известило за кривичната тужба, иако оттаму одбиваат да коментираат.
Ова досега е прва тужба против кредитна агенција поради наводни пропусти во врска со финансиската криза. Американските медиуми јавуваат дека некоку сојузни држави ќе се приклучат на тужбата.