Раководството на Барселона е подготвено драстично да ја намали цената на крилниот напаѓач Филипе Кутињо. На „Камп Ноу“ се подготвени да се разделат од Бразилецот доколку добијат понуда и од околу 25 милиони евра, пишува „Фудбал Еспања“.
Кутињо беше донесен во Барса од Ливерпул за бомбастична сума од 135 милиони евра. Сепак, тој ги разочара со својот настап Каталонците, кои веќе бараат начин да се ослободат од него, иако ќе бидат во голема загуба. Клубот веќе се раздели со Франциско Тринкао, кој замина на позајмица во Вулверхемптон, а на Самуел Умтити и Миралем Пјаниќ им беше понудено да се разделат со клубот со заедничка согласност.
Сепак интерес за Кутињо има, бидејќи тој е вклучен во плановите на Милан. Развојот на настаните со 29-годишниот играч ја следат неколку клубови од Англија, кои исто така би можеле да даваат понуди, особено откако неговата цена падна.