Published: Thursday, July 15, 2021 10:14
Безживотни тела на двајца мажи беа пронајдени во хотел на Флорида (САД), којшто некогаш беше вила во сопственост на модниот дизајнер Џани Версаче.
Телата го пронашла собарка, по што веднаш била известена полицијата во Мајами Бич која започна истрага. Причината за смртта, мотивите и идентитетот на жртвите сè уште не се познати.
Инаку, денеска се одбележува 24-годишнината од убиството на модниот дизајнер Џани Версаче. Тој беше убиен на прагот пред својот дом во Мајами Бич во 1997 година од серискиот убиец Ендрју Кунанан.
Вилата во која беа пронајдени телата „Каза казуарина“ е изградена во 1930 година, а Версаче ја купи во 1992 година. Таа е хотел од 2015 година.