Бојан Јовановски алијас Боки 13 попладнево е спроведен од домашен притвор во КПД „Идризово“ на издржување на деветгодишната затворска казна што ја доби во случајот „Рекет“. Веста ја потврди и Јовица Стојановиќ, директор на „Идризово“. Наредбата за трансфер на Јовановски е по одбивање на неговата и жалбата на поранешната специјална обвинителка, Катица Јанева од Апелацискиот суд, со што практично беа потврдени првостепените пресуди.
Извори на Нова ТВ брифираат дека Боки 13 во моментот се наоѓа во приемното одделение во „Идризово“, каде ќе остане до моментот додека не се спроведе контролата за тоа каде треба да е сместен – дали во затвореното, дали во полуотвореното или во отвореното одделение. Речиси, 99 отсто е веројатноста, вели изворот на Нова ТВ, Јовановски да биде сместен во полуотвореното одделение, бидејќи периодот што диосега го минал во притвор, а тоа се околу две години, му го дозволува тоа.
– Апелациониот суд Скопје, постапувајќи по кривичниот предмет КОКЖ -91/20 познат во јавноста под името „Рекет“, донесе одлука со која жалбите на обвинетиот Бојан Јовановски од Скопје и обвинетата Катица Јанева од Скопје, ги одби како неосновани, а првостепената пресуда ја потврди. Вака донесената одлука ќе биде објавена во целост на веб-страницата на судот во рокот определен со Законот за управување со движењето на предметите во судовите, информираа од Апелационен суд Скопје.
Јовановски беше осуден на казна затвор во траење од девет години за делото „перење пари и други приноси од казниво дело“ во предметот „Рекет“.
За Јанева, пак, сè уште не е познатa одлуката на судијата за извршување на санкции и дали до него има поднесено некаква молба за одложување на извршувањето на затворската мерка. Јанева е осудена на седумгодишна казна затвор за делата „примање награда за противзаконито влијание“ и „злоупотреба на службена положба и овластување“.