Претседателот Стево Пендаровски денеска ставил потпис на измените на Законот за државјанство кој го изгласаа пратениците. Со овие измени секое барање треба да се реши во рок од шест месеци, а постапката да заврши за три години.
Собранието вчера го донесе Законот за изменување и дополнување на Законот за државјанство. За измените и дополнувањето вкупно гласаа 89 пратеници, од кои 57 „за“, 32 „против“ и ниту еден „воздржан“. Со измените на законот треба да се реши статусот на луѓето од поранешните југословенски републики кои до денот на прогласување на независноста живееле во земјава. Тие ќе треба да добијат државјанство во рок од три години по стапувањето во сила на Законот.
Потребно е да се приложи било каков документ со кој ќе докажат дека живееле во земјава пред нејзиното осамостојување. Тоа може да биде извод од родените, свидетелство, платена сметка, платен данок, лична карта или пасош од СФРЈ, здравствена книшка или извештај за лекување, поседовен или имотен лист и друго.
Пендаровски најави можност дека нема да ги потпише измените на Изборниот законик со кои независните листи треба да соберат потписи од два отсто од избирачите во таа општина. Но, ако законот добие широка политичка и поддршка од граѓанските здруженија, тој би го поддржал односно би го потпишал указот на измените на Изборниот законик.