Претседателот на Собранието, Талат Џафери денеска ги распиша локалните избори што треба да се одржат на 17 октомври. Решението за распишување на изборите ќе биде доставено до Државната изборна комисија (ДИК), како и до Министерството за надворешни работи (МНР) и до Министерството за правда.
– Денес го потпишав решението за распишување на локалните избори за членови на советите на општините и Советот на Град Скопје, за градоначалници на општините и за градоначалник на Град Скопје. Според законските одредби, локалните избори ќе се одржат на 17 октомври во 2021 година. Бидејќи изборната кампања почнува дваесет дена пред денот на одржување на изборите, во тој период Собранието нема да има пленарни и комисиски седници. На овој начин, им се овозможува на политичките партии и кандидати целосно да се посветат на изборната кампања, а во исто време да се одбегне можноста кампањата да се пресели во собраниската сала, потенцира Џафери.