Денеска во 14:30 часот, воздушниот простор на Република Северна Македонија официјално се вклучува во системот на НАТО воздушното патролирање. За таа цел во воздушниот простор над главниот град ќе биде организирана активност со цел демонстрирање на начинот на изведување на мисијата на НАТО за воздушно патролирање над Република Северна Македонија, организиран на Меѓународниот аеродром Скопје.
Како што соопштија од владината прес-служба, за време на планираната активност, медиумите и пошироката јавност ќе можат да се запознаат и да посведочат за начинот на кој се изведува воздухопловното патролирање, како и да се запознаат со борбените воздухоплови на НАТО Ф-16 и АВАКС кои ќе бидат вклучени во оваа активност.
На настанот иако прво беше најавено присуство на премиерот Заев, поради пролонгирањето на слетувањето на авионите неговото присуство е одложено. На настанот, како што претходно беше најавено ќе присуствуваат министерката за одбрана, Радмила Шекеринска и високи гости од Собранието и од Владата, командантот на НАТО центарот за комбинирани воздушни операции во Торехон, генерал потполковник Фернандо де ла Круз Каравака и началникот на Генералштабот, генерал-потполковник Васко Ѓурчиновски. По завршување на настанот, обраќања ќе имаат министерката Шекеринска и генералот Де ла Круз.
