Градоначалничката на Град Скопје, Данела Арсовска денеска пред новинарите даде отчет за сработеното во првите 82 дена од нејзиниот мандат.
Таа истакна дека по две години повторно е во функција жичницата до врв на Водно.
„Во изминатиот период направен е редовен годишен преглед од овластена институција, мониторинг од Државен инспектор за жичници, како и редовен технички преглед, се со цел жичницата да биде безбедно превозно средство за скопјани. Во насока на олеснување на сообраќајот во оптек се пуштени и трите автобуски линии до Средно Водно и тоа 25, 25А и 25Б. Од моментот на почнување со работа на жичницата за само 1 месец ја имаат користено повеќе од 25 илјади посетители“, додаде Арсовска.
Таа посочи дека се исчистени и над 150 диви депонии во Градот, од кои над 120 мапирани за време на изборната кампања. Арсовска истакна дека се воведени редовни ноќни линии на автобускиот превоз, особено за време на викендот.
„За прв пат од функционирањето на Советот на Град Скопје се овозможи со директен пренос во живо да се одвиваат седниците на Советот на Град Скопје со што демонстрираме транспарентност во работењето на Советот“, истакна градоначалничката Арсовска.
Град Скопје стави во функција и електронска адресата за комуникација со граѓаните 24@skopje.gov.mk како чекор кон транспарентно управување со цел 24 часа постапување во служба на граѓаните, а отворена е посебна телефонска линија 02 3207 536.