Јавноста била сведок на многу грешки, гафови, сквернавења на македонските национални симболи, па и скандалозни изведби на државната химна „Денес над Македонија“ како онаа на поп ѕвездата Тамара Тодевска на прославата по повод празникот 4 јули во американската амбасада пред неколку години. Ни се случувало со погрешни знамиња да пречекуваме функционери, но досега не сме била сведок на интонирање на националната химна на прес конференција.
Ваков гаф вчера направи протоколот на Град Скопје кога настанот за отчет на градоначалничката Данела Арсовска за сработеното во текот на 82 дена, откако е на функцијата, реши да почне со државната химна. Згора на сѐ, уште на самиот почеток беше направена „утка“, па прес конференцијата на Арсовска, почна со химната на ВМРО-ДПМНЕ.
Новинарите кои досега немаат забележано ваков пропуст, останаа вчудоневидени на обидот на градските власти, рефереирањето за сите исчистени депонии, нивелирани шахти и други комунални работи што биле завршени во последниве три месеци, што е всушност и обврскa на градските власти, да биде означено со државната химна.
Ниту чуено, ниту видено. Ова е гаф на годината. Ова е прекршок. Треба да се казни непочитувањето на употребата на националната химна, се само дел од пораките и коментарите во јавноста.
Нова ТВ, по реакциите во јавноста, побара од тимот на Арсовска одговори врз основа на кој законски акт или протокол е решено да се интонира државната химна на прес конференција, кога во законската регулатива е јасно пропишано кога треба тоа да се направи и како е дојдено до ваков пропуст, но и покрај ветувањето дека ќе добиеме објаснување, до објавување на овој напис, тоа не се случи.
ШТО ВЕЛАТ ЗАКОНСКИТЕ ОДРЕДБИ ЗА УПОТРЕБА НА ХИМНАТА?
Во Законот за употребата на грбот, знамето и химната се пропишува дека овие национални симболи се употребуваат на начин со кој не се нарушуваат угледот и достоинството на државата. Па така во членот 25 од Законот, се вели дека химната се изведува при испраќање на претседателот на републиката во официјални посети на странски држави и при неговото враќање во државата. Потоа при официјално доаѓање во државата, односно при испраќање од земјава на претседател на држава, суверен или овластен претставник на меѓународна организација, при полагање венци на воени гробишта, гробови на паднати борци и на други слични места од страна на официјалните македонски претставници.
Законодавецот пропишал дека химната може да се изведува на прослави, политички собири, паради и други свечени манифестации со кои официјално се одбележуваат настани од значење за единиците на вооружените сили и за граѓаните, при меѓународни средби, натпревари и други собири (политички, научни, културно–уметнички, спортски и други) на кои државата официјално учествува или е презентирана, во согласност со правилата и практиката на одржувањето на тие собири.
Химната се интонира на погреб на заслужни личности. Во законот е нагласено дека химната се изведува со: свирење, пеење или и со свирење и со пеење, но секогаш со достоинство.
КАЗНИ И ДО 300.000 ДЕНАРИ
Во делот на казнените одредби законодавецот пропишал парична казна од 50.000 до 300.000 денари за правно лице кое ќе ги прекрши законските одредби при употреба на химната.
Со парична казна од 10.000 до 40.000 денари ќе се казни и одговорното лице. За прекршок е предвидена и парична казна од 20.000 до 50.000 денари и за одговорното лице на органот на државната власт, на единицата на локалната самоуправа, јавната установа, јавното претпријатие и јавната служба, што ја основа Републиката, односно единицата на локалната самоуправа.
Понатаму, казнените одредби предвидуваат парична казна од 20.000 до 50.000 денари, ако прекршокот се изврши на јавен собир. Во ваков случај казната ја плаќа лицето одговорно за организацијата на јавниот собир.
Стојанка Митреска