Две и пол години затворска казна за поранешната министерка за внатрешни работи Гордана Јанкулоска, 4 години и 6 месеци за Миле Јанакиески, условна казна за Мартин Протуѓер пресуди судечкиот совет во судскиот процес „Титаник“ во кој претходно обвинетите за изборни нерегуларности признаа вина.
Јанкулоска затворската казна ја доби поради „злосторничко здружување“, „повреда на слобода на определување на избирачите“ и „повреда на избирачко право“
Условна казна доби и Билјана Бришковска, поранешна заменичка во Министерството за правда која исто така како и претходните обвинети поранешни функционери на ВМРО-ДПМНЕ призна вина.
Условните казни затвор од 2 години за Протуѓер и Бришковска, според судечкиот совет, нема да се извршат ако во рок од 5 години не сторат ново кривично дело. Условни казни се пресудени и за Катерина Велковска и Кирил Тодоровски. Бришковска-Бошкоски е осудена поради фалсификување на исправа, Катерина Веловска поради повреда на слобода на определување на избирачите, а Киро Тодоровски поради повреда на избирачкото право.
Претседателот на Судечкиот совет, Осман Шабани, рече дека како отежнувачки околности за Миле Јанакиески и Гордана Јанкулоски Судот посебно го ценел фактот што противправните дејствија ги сториле во улога на министер за транспорт и врски, односно министер за внатрешни работи, околноста што истите се досега осудувани и се водат други постапки. Околноста за осудуваност ја посочи и за обвинетиот Мунир Пепиќ.
Како олеснителни околности ги наведе признанието на вина, коректното однесување, личните и семејни прилики како и здравствената состојба.
За обвинетите Мартин Протуѓер, Билјана Бришковска-Бошкоски, Катерина Веловска, Киро Тодоровски и Коста Митроски судот го ценеше тоа што истите не се досега осудувани и против нив не се води постапка за друго кривично дело.
Мерка куќен притвор побара обвинителката Лиле Стефанова, да му биде определена на Јанакиески:
– Фактот што обвинетиот Миле Јанакиески веќе е осуден од овој суд со казна затвор од 6 години и 3 месеци, како и фактот што против него се водат и други кривични постапки, од една страна, а од друга страна имајќи го предвид фактот што тој има влошена здравствена состојба поради причини на опасност од бегство, предлагам спрема обвинетиот да биде определена мерка куќен притвор која ќе трае до започнување на издржување на казна затвор.
Обвинителството ги терети за неколку кривични дела – злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
Мартин Протуѓер, Миле Јанакиески, Катерина Веловска, Гордана Јанкулоска, Мунир Пепиќ, Билјана Бришковска-Бошкоски, Кирил Тодоровски и Коста Митроски се обвинетите кои признаа вина на претходното рочиште. Тие претходно побараа, при изрекувањето на пресудата, судот да ги има предвид сите олеснителни околности, а обвинителката Лиле Стефанова побара ублажување и условување на казните.
Освен поранешниот премиер Никола Груевски кој е во бегство, и обвинетите кои признаа вина, во „Титаник“ обвинети се и Кирил Божиновски, Илија Димовски, Едмонд Темелко, Леко Ристоски, Станко Коруновски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.
Случајот „Титаник“ го води судијата Осман Шабани, додека, обвинението го застапува обвинителката Лиле Стефанова.
Судењето за останатите обвинети во случајот кои се изјаснија дека не се чувствуваат виновни се очекува да продолжи на 9 март.
С.М.