Прилепското Основно јавно обвинителство отворило предистражна постапка за исчезнувањето на десетгодишниот Петар Џ. , кој од страв би можел да се сокрие дури и од луѓето што го бараат
Еве веќе три дена го бараме 10 годишниот Петар, но се уште, за жал, нема никаква трага од детето, кое пак би можело да се крие и од луѓето коишто го бараат, вели за НОВА ТВ Роберто Илиески, раководител на Доброволното противпожарно друштво Архангел од Битола кој, заедно со уште петмина доброволци од друштвото, повеќе од 100 полицајци, противпожарни служби, ловџии, како и граѓани доброволци од неколку градови трагаат по Петар Џобоски.
Детето исчезна во петокот попладне, кога, според пријавата на таткото Стојан, се оддалечило од својот дом во прилепското село Врбско. Инаку, Петар е лице со посебни потреби. Прилепското Основно јавно обвинителство отворило предистражна постапка за исчезнувањето на десетгодишниот Петар Џ.
– Ние го пребаруваме реонот од влезот во селото десно кон планината, и засега нема никакви траги, иако имаше и прелети со дрон во саботата. Три дена веќе го бараме детето и, дај Боже, да е скриено некаде. Има и тврдења дека тој може и да се исплаши од луѓето коишто го бараат и дури и од нив да се крие… Временските условите се неповолни, навечер е постудено за 4 до 5 степени, а првата ноќ температурата беше минус 4 степени, а сношти и постудено, плус и со снег од над 30 сантиметри. За тоа колку детето би можело да се оддалечи од селото, според разговорот и со лицата од Единицата за брзи интервенции и со медицинските лица, треба да се наоѓа во радиус од некаде 5 км од селото – вели Илиески.
Тој појаснува дека според сознанијата, постои можност детето да се врти и во круг во реонот каде исчезнало, односно на границата меѓу прилепскиот и битолскиот дел на Мариово.
– Теренот е многу непристапен, а еве ниту кучињата не успеаја да влезат во трага, многу луѓе досега го поминаа теренот, а еве од вчера заврна и снег … Во хеликоптерот кој трага по детето е и мештанин од селото и вработен во посебната единица и го пребаруваат теренот. И шумата тука е многу густа и теренот е тежок за пребарување, со многу стрмнини. Сепак, да се надеваме на среќен исход, дека ќе успееме да го најдеме Петар – очекува Илиески.
Родителите дале изјави и во Обвинителство, Петар еднаш се изгубил и во Прилеп.
Таткото на Петар, Стојан, вели дека штотуку се вратил од полицијата каде му кажале дека се уште нема ништо ново од потрагата по неговиот син. Тој ни потврди дека синоќа, заедно со мајката на Петар и 19 годишниот брат, биле во прилепското Основно јавно обвинителство каде дале изјави во врска со исчезнувањето на нивниот син и брат. Обвинителството отворило предистражна постапка за исчезнувањето на десетгодишниот Петар Џ.
– Започнавме со предистражната постапка. Разговаравме со родителите на детето и 19-годишниот брат. Очекуваме дополнителни информации и од полицијата. Истрагата продолжува – велат од Обвинителството во Прилеп.
– Само што бев во полиција, и за жал, се уште нема нови вести коишто ги очекуваме, нашиот син да биде пронајден. Досега се случи еднаш Петар да се изгуби во градот, во Прилеп, но тогаш имавме среќа, тој беше набрзо пронајден од едни луѓе кои му помогнале да се врати од продавница. Дај Боже така да е и овојпат, нашиот син Петар да биде пронајден – вели таткото Стојан.
МВР објави телефонски број на дежурната служба во село Витолиште, каде што граѓаните можат да се обратат за координација – телефонскиот број е 071 268-594. Од полицијата апелираат – доколку некој има информација која би помогнала за пронаоѓање на детето, веднаш да се јави во МВР.
Неданоски: „Најмногу се надевавме во петокот вечерта – кога ги пребаравме сите штали и куќи во селото“
И членовите на спасителната служба „Златоврв“ од Прилеп уште од првиот ден се во потрага по 10 годишното момче.
– Најмногу се надевавме вечерта во петокот кога бевме над 60 луѓе и кога ги пребаравме сите штали и куќи во селото, но за жал, не успеавме. Се бара Петар на секоја страна, досега нема никаква трага, а дај Боже, сите се надеваме дека сепак ќе го пронајдеме детето Во потрагата се вклучени сите – и полицајци, доброволни друштва, пожарникари, но и од ловечките друштва. Постепено се шири обрачот којшто го пребаруваме, но во тој предел се големи долови, густа е вегетацијата и не може побрзо да напредуваме, а дополнително отежнување е што заврна многу снег, па и теренски возила се заглавија. А за утре се најавува и нов снег…. – вели Дарко Неданоски, раководител на спасителната служба „Златоврв“.
Љубица Балабан