Пратеничката група на ВМРО-ДПМНЕ денеска поднесе закон во итна постапка за намалување на акцизите на енергенсите за 50 отсто.
„Моделот на Владата за намалување на акцизите е сложен и како што гледаме нема позначаен ефект. Во моментов акцизата за дизел и бензин горивата е намалена за само 1 денар. Намалувањето на акцизата не треба да биде врзано со движењето на цената на барелот, туку треба да е фиксно“, изјавија од пратеничката група обвинувајќи ја Владата дека нивниот пристап довел до гужви и недостиг на гориво поради непредвидливост на цените.
Токму затоа, велат, бараме фиксно намалување за 50 отсто на акцизите за дизел гориво и бензинот.
Опозициската пратеничка група бара и целосно намалување на акцизата од 4,9 денари за овие енергенси. „Со овој наш предлог, литар дизел гориво веднаш ќе се намали за 9 денари, литар бензин ќе се намали за 12 денари, а метанот и плинот за 5,5 денари по литар“, појаснија од ВМРО-ДПМНЕ.